Астанада өткен қазақстандық-эмираттық бизнес-форум шеңберінде «Самұрық-Қазына» АҚ активтерді жекешелендіру және қайта құрылымдау департаментінің бас менеджері Әсет Құрманбаев Қор активтерін жекешелендіру туралы баяндады. «Қордың жекешелендіруге жататын нысандарының тізіміне 43 ірі актив енеді. Соның ішінде қорларды өндіретін («Тау-Кен Самұрық» АҚ, «ҚазМұнайГаз» ҰК» АҚ, «Қазатомөнеркәсіп» ҰАК» АҚ, «Майқайыналтын» АҚ), көліктік ( «Қазақстан темір жолы» ҰК» АҚ, «Еуро-Азия Эйр» АҚ, «Эйр Астана» АҚ, Qazaq Air) және өзге компаниялар. Бұған қоса, шетелдегі активтер сатылуда. Бәсекелестік ортаға шығарылатын компаниялардың әрқайсысы ерекше әрі тартымды», - деп атап өтті Әсет Құрманбаев. «Біз инвесторлардың барлығы үшін ашықтықты қамтамасыз етеміз. Активтерді сатудың икемді стратегиясына сүйенеміз. Бұл үшін сатудың әр алуан әдістері қолданылады: IPO, ашық екі кезеңді конкурс, электрондық конкурс, аукцион. Жекешелендіру барынша жариялы өткізіліп жатыр. Көпсатылы бақылау жүйесі де құрылды», - деп қосты ол. Жекешелендірудің 2016-2020 жылдарға арналған кешенді жоспары аясында «Самұрық-Қазына» АҚ 215 активін сатады, бүгінде Қор тобының құрамынан 132 актив шығарылып үлгерген. 6 компанияны үш кезеңмен ІРО-ға шығару көзделген: бірінші кезеңде - Air Astana және «Қазатомөнеркәсіп» ҰАК» АҚ, екіншісінде – «Самұрық-Энерго» АҚ және «ҚазМұнайГаз» ҰК» АҚ, үшіншісінде –«Қазпошта» АҚ және «НК «Қазақстан темір жолы» ҰК» АҚ.