«Самұрық-Қазына» қоры Президенттің таяудағы Жолдауына сәйкес Қордың 2032 жылға дейінгі жаңа даму стратегиясының жобасын әзірледі. Қордың Қазақстан экономикасындағы үлесін 2032 жылға қарай 5%-ға дейін азайту жоспарланып отыр, деп мәлімдеді бүгін ҚР Президенті жанындағы Орталық коммуникациялар қызметінде (ОКҚ) өткен баспасөз брифингінде «Самұрық-Қазына» АҚ Басқарма төрағасы Алмасадам Сәтқалиев.

«Басты мақсат – адал бәсекелестікті дамыту. «Самұрық-Қазына» қорының стратегиялық емес активтері экономикалық жағынан орындылығы мен тиімділігіне қарай біртіндеп шығарылатын болады", - деді А. Сәтқалиев. Оның айтуынша, «Самұрық-Қазына» қоры біртіндеп инвестициялық холдинг моделіне ауысып, портфельдік компаниялардағы үлесін қысқартатын болады.

Сонымен қатар, Қор бүкіл компаниялар тобының алдына таяудағы 10 жылға бірнеше нақты міндеттер қойып отыр:

● Қордың таза активтерінің жалпы құнын 2 есеге арттыру;

● Еңбек өнімділігін 1,5 есеге арттыру;

● Таза көміртегінің әсерін 10%-ға төмендету;

●ESG рейтингі бойынша әлемнің үздік компанияларының нәтижелеріне қол жеткізу (50 персентиль).