Бүгін Астанада екі ел басшыларының қатысуымен Қазақстан-француз бизнес-форумы өтті.

Пленарлық сессияда Францияның Сыртқы сауда, экономикалық тартымдылық және шетелдегі француз азаматтарының істері жөніндегі министр-делегаты Оливье Бешт және Францияның Индустрия министрі Ролан Лескюр сөз сөйледі. Қазақстан тарапынан «Самұрық-Қазына» қорының басшысы, ҚР Өнеркәсіп және құрылыс министрі және ҚТЖ Басқарма төрағасы сөз сөйледі.

Нұрлан Жақыпов өз сөзінде, Қордың компаниялар тобының француз бизнесімен бұрыннан серіктестік қарым-қатынаста екенін атап өтті.

«Қазатомөнеркәсіп» ҰАК» АҚ табиғи уранды жеткізуде «Electricite de France» компаниясымен өзара іс-қимыл жасайды, «Orano Mining» компаниясымен бірлесіп, уран өндіруді жүзеге асырылады, ал «Framatome» компаниясымен жылу бөлетін жинақтарды өндіруде технологиялық әріптес болып табылады. «Эйр Астана» компаниясы Airbus әуе кемелерін лизингке алады, ал ҚТЖ Alstom компанисынан электровоздар мен жиынтықтауыштарды сатып алады.

Тараптар ынтымақтастық бағыттарын кеңейту бойынша белсенді жұмыс істеуде. Total Eren компаниясымен қуаты 1 ГВт болатын жел электр станциясын салу туралы уағдаластыққа қол жеткізілді. Сол күні таңертең Ақордада Бірлескен кәсіпорын құру туралы келісімге қол қойылды. 

Сондай-ақ форум шеңберінде жобаларды қаржыландыруға, кредиттік және қазынашылық операцияларды жүзеге асыруға, ESG-стратегиясын іске асыруға және активтерді жекешелендіруге қатысуға бағытталған Қор мен Societe Generale арасындағы Ынтымақтастық туралы меморандумға қол қойылды.