«Самұрық-Қазына» қоры мен ҚР Ғылым және жоғары білім министрлігі қазақстандық ғалымдардың ғылыми-техникалық жобаларын сараптаудың жаңа тетігін іске қосып жатыр.

Заң бойынша ҚР жер қойнауын пайдаланушылар жыл сайын ғылыми-зерттеу, ғылыми-техникалық және тәжірибелік-конструкторлық жұмыстарды өткен жылы өндіруге жұмсалған шығындарының 1 пайызымен қаржыландыруға міндетті. 2022 жылдың сәуір айынан бастап «Самұрық-Қазына» тобының өндіруші компаниялары бұл қаражатты «Самғау» ғылыми-технологиялық бастамалар орталығына (ҒТБО) бағыттайды. Оның мақсаты - қазақстандық ғылымды дамыту және ғалымдар мен өндірушілер арасында байланыс орнату.

Жақында «Самғау ҒТБО мен ҚР ҒЖБМ жанындағы Ұлттық мемлекеттік ғылыми-техникалық сараптама орталығы «Самұрық-Қазына» тобының жер қойнауын пайдаланушы компаниялары қаржыландырылатын жобаларға ғылыми-техникалық сараптама жүргізу туралы шартқа қол қойды. Жаңа тетік Қор тобындағы ғылыми әзірлемелерді қаржыландыру мен басқаруды жүйелендіруге және оңалтуға мүмкіндік береді.