«Самұрық-Қазына» АҚ корпоративтік басқаруды дамытуға қосқан үлесі үшін Qazaq Independent Directors қауымдастығының марапатына ие болды. Қауымдастық 2007 жылдан бері тәуелсіз директорлар институтын дамытуға және Қазақстандағы корпоративтік басқаруды жетілдіруге ықпал етіп келеді.

Марапат «Самұрық-Қазынада» өткен «Қор тобындағы корпоративтік басқаруды дамыту: тәжірибелер, басымдықтар, ЖИ енгізу» семинары аясында табысталды.

Семинарға қатысушылар Директорлар кеңестері мен корпоративтік хатшылардың жұмысына қатысты заманауи тәсілдерді, басқарушылық шешімдердің сапасын арттыруды және корпоративтік басқаруда жасанды интеллектіні қолдану мәселелерін талқылады. Қордың портфельдік компанияларының Директорлар кеңесінің мүшелері мен корпоративтік хатшылары тәжірибелік кейстермен бөлісті.

Директорлар кеңестерінің қызметін бағалауға арналған ЖИ-агентке – осындай бағалаудың әділдігін, сапасы мен тиімділігін арттыруға мүмкіндік беретін жаңа құралға ерекше назар аударылды.

Сондай-ақ семинар аясында корпоративтік басқарудың үздік тәжірибелері үшін Samruk-Kazyna Awards марапаттары табысталды:

• Corporate Governance Excellence Award — корпоративтік басқару саласындағы үздік жетістіктері үшін — «KEGOC» АҚ.

• Board Leadership Award — Директорлар кеңесінің қызметіндегі көшбасшылығы үшін — Нұржан Байдәулетов, «Қазақтелеком» АҚ.

• Independent Director Excellence Award — тәуелсіз директордың үздік жетістіктері үшін — Сая Мыңшәріпова, «ҚазМұнайГаз» ҰК» АҚ, «QazaqGaz» ҰК» АҚ, «Samruk-Kazyna Construction» АҚ.

• Corporate Secretary Excellence Award — корпоративтік хатшының үздік жетістіктері үшін — Дамир Шәріпов, «ҚазМұнайГаз» ҰК» АҚ.